هويس الشعر العربى .. هشام الجخ


فى أطار سعى المدونة لنشر الثقافة  سيكون معنا بأذن الله كل أسبوع شاعر ننشر جميع قصائده سواء مكتوبة أو مرئية أو مسموعة و نحاول أن نجمع كل شىء عنه و سنبدأ بهويس الشعر العربى هشام الجخ

السيرة الذاتية لشاعر الهويس هشام الجخ

هكذا كتب هشام سيرته الذاتيه فى صفحته على الفيس بوك

ابنة هشام الجخ
اللحظة دي صعبة جدا
لما يطلبوا منك باصرار انك تكتب تعريف للناس عنك وعن حياتك
خلينا نحاول
انا هشام الجخ
اصلا من قنا .. مركز ابو تشت..ومسقط رأسي سوهاج وخوالي كمان من سوهاج
درست واتربيت في سوهاج لغاية ما دخلت كلية التجارة هناك
حولت من تجارة سوهاج لتجارة عين شمس واتخرجت في جامعة عين شمس سنة 2003
اتعينت مشرف على المركز الثقافي في جامعة عين شمس في نفس سنة التخرج وعملت دراسات عليا في ادارة الاعمال في نفس الجامعة
زمايلي وانا اسسنا المركز الثقافي في الجامعة وكانت فترة نهاية التسعينات وبداية الالفية الجديدة - بفضل الله - عصر مشهود له في تاريخ جامعة عين شمس ادبيا
استقلت من الوظيفة بالجامعة سنة 2009 لاني باختصار معرفتش اعيش حياة الموظفين التقليدية ده غير ان البيروقراطية وقتها كانت شيء قاتل لكل الانشطة الطلابية ولكل مناحي الابداع
اهتميت بمشروعي اللي بقالي 15 سنة بحلم بيه وهو زيادة شعبية الشعر في مصر واعادة الشعر على السنة الشباب والاطفال

في السكة بقى حصلت حاجات كتير طبعا
حصلت على احسن شاعر عامية من اتحاد الكتاب سنة 2008
حصلت على شوية مراكز في الشعر الفصيح والعامي ايام الجامعة
يعني .. مش ده المهم
المهم اني بحب الشعر جدا .. وبذاكره .. وبكتبه على مهلي جدا جدا جدا
ومش بقول شعري لحد غير لما اكون انا قريته 40 مرة وعجبني تماما

بحب اسمع مزيكا هادية جدا
لكن ساعات بتلاقيني قلبت وشغلت مزيكا صاخبة وقمت ارقص
باستمتع قوي قوي قوي بالرقص الصعيدي والنوبي والسمسية

اهلاوي وبحترم جمهور الزمالك وكنت بالعب باك يمين في فريق سوهاج ايام 4-2-4 لما كان فيه حاجة اسمها باك وحاجة اسمها وينج

اتجوزت سنة 2004 وربنا افاض عليا بزوجة صالحة وبنتين زي القمر
مواليد اول اكتوبر ..يعني برج الميزان
رغم اني كنت ابن والدتي الوحيد - رحمها الله - لكن ما اظنش اني عشت كولد مدلل .. يمكن لان والدتي - رحمها الله - كانت سيدة تربوية بحكم عملها كرئيس قطاع تعليمي بسوهاج ويمكن لان ابويا لم يكن يفرق في المعاملة بين ابنائه ونسائه فخرجنا جميعا متساويين في المعاملة والتربية

لما جيت القاهرة جديد كنت لسة في الجامعة اشتغلت في مجال التصميمات والجرافيك والطباعة .. تركت المجال لكني مازلت - حتى وقتنا هذا - لما باعدي على جسر السويس لازم ادخل عين شمس واسلم على صحاب المطابع والصنايعية اصدقائي

باحترم الناس جدا
واي حد بيعمل معايا موقف وحش باحط نفسي مكانه وافكر باسلوبه واحاول اتعامل مع الموقف من وجهة نظره

امتع لحظاتي لما اقف على المسرح واشوف عيون الناس بتلمع وهي بتسمع شعر
واتعس لحظاتي لما حد ميعرفنيش يتهمني بالغرور
غرور على خيبة ايه مش عارف؟؟تقولش الواد حليوة قوي؟؟؟

بكره نظام حسني مبارك جدا جدا جدا وشفت بعيني الناس اللي اتحرقت في قطر الصعيد وهي حية.. ولو النظام اللي بعده كان زيه او حتى شبهه يبقى مكتوب على هشام الجخ تفضل قصايده ممنوعة - اقصد القصايد المهمة طبعا

بحلم بالمساواة
مسلم ومسيحي وصعيدي وبحراوي وغني وفقير
نفسي الشباب اللي في سني يلقوا شقق يتجوزوا فيها ويلقوا وقت يقروا ويتثقفوا ويفكروا .. ونفسي جدااااااااااااااااا اصلي في المسجد الاقصى
تحياتي لحضراتكم جميعا

الحساب الشخصي الوحيد بتاعي على الفيس هو ده
http://www.facebook.com/profile.php?id=717061330
والجروب الرسمي الوحيد بتاعي على الفيس هو ده
http://www.facebook.com/group.php?gid=147759865289
والموقع الرسمي الوحيد الخاص ليا هو ده
www.algakh.com


السيرة الذاتية لشاعر الهويس هشام الجخ كما كتبت على موقعه

الإسم : هشام كامل عباس محمود الجخ
تاريخ الميلاد : الأول من اكتوبر ( برج الميزان )
الحالة الأجتماعية : متزوج - و لديه طفلتان ( مريم - هاجر )
المؤهل : خريج كلية تجارة - جامعة عين شمس بس الأول كان فى جامعة أسيوط و قام بالتحويل، و عمل دراسات عليا فى إدارة الأعمال
تاريخ التخرج : 2003
التعيين : تعين فى جامعة عين شمس مسؤول عن المركز الثقافى
( فى نفس سنة تخرجه )
تاريخ الإستقاله : 11\2009 ، لأنه لم يتمكن من العيش كموظف
المطربين المفضلين لديه : فيروز , أم كلثوم , محمد منير طبعاً , حنان ماضى , أنغام , شيرين , وائل جسار , مارسيل خليفه , كاظم الساهر
رقم الأستاذ أحمد غريب مدير أعمال شاعرنا : 0103624845

و سوف نبدأ بأمر الله فى نشر جميع أعماله و ما يتعلق به من أخبار فى الفترة القادمة
Share

هناك تعليق واحد:

  1. محمد بيسوووووووووووووو24 نوفمبر 2014 1:00 ص

    ربنا يوفق شاعرنا المتميز
    يستحق لقب هويس الشعر العربي
    اتمنى له التوفيق فى حياته كلها
    تحياااااااااتى الحارة له

    ردحذف