بلغني ايها المصري الحزين






بسم الله الرحمن الرحيم

بلغني ايها المصري المهموم .. بكيفية توفير الاكل والهدوم .. ان حكومتنا الجديده .. قراراتها لم تكن سديده .. واتجهت مره اخرى لطلب القروض .. غير مباليه بما على ذلك من فروض ..ورغم كل النداءات الشعبيه .. من المتخصصين والارزقيه .. برفض تلك السياسه العقيمه .. ولا هنعمل زي ما كانت بتعمل ريمه .. اصرت الحكومه على اتجاهاتها .. واكملت في الاقتراض خطواتها .. ولزيادة وتضخيم الازمه .. وضعت ذلك في الموازنه .. مما ادى الى غضب شعبي عارم .. وكان رفض المجلس العسكري صارم .. وتغنت وسائل الاعلام بالعبقريه .. في القرارات العسكريه .


بلغني ايها المصري العسل ... ان اللي خايف منه حصل ... وان الدكتور عصام شرف ... عنده قضيه تمس الشرف ... من قبل الثوره والنيابه بيبعتولوا .. لانه سرق خمسين الف يورو ... حسب جريدة صوت الامه ... هي اللي كشفت تلك الازمه ... بالورق والوثائق والمستندات... ولم يكن كلام ترهات ... والى الان لم يصدر عن الرجل اي بيان .... يكذب الكلام اللي جه في الجرنان .


بلغني ايهاالمصري الشجاع .... ان عمرو موسى اتباع ... وكل يوم بتقل في الشارع شعبيته .. لدرجة انه ممكن ما يكملش في سكته .... وطلع متورط في موضوع الغاز ... الموضوع اللي كله نكت والغاز ... ده غير ندواته الانتخابيه .. اللي كلها بلطجيه .. واحساس الشعب انه متعالي ... وحاطط مناخيره في العلالي .


بلغني ايها المصري الحنين ... ان نجيب ساويرس اتجنن .. ونشر كاريكتير مسيء للاسلام ...اثار حفيظة الاقوام .. وهاجموه بضراوه وبشده ..عن فعلته المفتقده للسده .. ووصل الامر الى تقديم البلاغات القضائيه ... ومحاربة قناته الفضائيه .. والتهمه هي ازدراء الاديان ... فنزلت مكانته كما ينزل لاعب السلم والثعبان ... وقيل انه اعتذروتأسف .. لكل من تأذى وتأفف .. وقال ان الامر كله مزاح ... ولكني اعتقد ان اللي راح راح .


بلغني ايها المصري الهمام ... ان توفيق عكاشه مش عارف ينام ... بعد كمين قناة التحرير ... وظهوره في البرنامج المثير ...مع المذيعه دعاء سلطان .. اللي لبسته العمه والقفطان ... وملأ الدنيا حكايات واكاذيب ... عن تعرضه من بلال فضل للتعذيب .. عن طريق السب بالام والاب ... وقال ان حقه عند الرب .. ثم تطاول وازداد في الهراء .. واستخدم كل كلمات الهجاء ... عن ان بلال فضل مزدزج الجنسيه ... متناسيا انه مصري مخلص ويطارد الحراميه .. وقال توفيق عكاشه .. على قناته الغشاشه ... ان الفضل يرجع لمامته سوزان ... وبصراحه احنا قرفنا يا توتومن كلام النسوان .


بلغني ايها المصري اللي لسه معايا .... ان المجلس العسكري لسه ماسك العصايه .... بعد ما كنا نعد الساعات والدقائق .. لنكتب علانية عن اي حقائق ... وعن ما اذا كان هناك لا يزال تعذيب ... فاستخدم المجلس سياسة الترهيب ... رغم ان الشرطه لازالت تمارس الفظائع ... من تقبيل احذيه وضرب وتقطيع الاصابع .. ويكون جزاء الضابط لفت نظر .. عن هذا الفعل القذر .. او ايقاف عن العمل .. حتى اصبح الامر يدعو للملل .


محمد حسن


Share

ليست هناك تعليقات:

إرسال تعليق