عارف ليه أنا هقول "لا" للتعديلات الدستورية

بصراحة كده دماغى تعبت من موضوع التعديلات الدستورية لأنى كنت حسن النية و فاكر أن الطبيعى أن الناس هتقول "لا" للتعديلات الدستورية لأن زى ما ستى و ستك قالوا اللى أتلسع من الشوربة ينفخ فى الزبادى و لأنى كنت فاكر أن الناس فاهمة أن الموافقة على التعديلات دى هتجيبلنا رئيس منعرفوش علشان يعمل دستور بنحلم بيه و كنت فاكر أن الناس فاهمة أن ساعتها هنكون زى ما ستى قالت سلمنا القط مفتاح القرار و أفتكرت أن الناس فاهمة أن الريس اللى جاى لو وافقنا عالتعديلات هيحط دستور شكله حلو كده و متفصل على مقاسه و هيطلع لينا برده ساعتها اللى هيهللوله و يشكروه على أنه أنعم علينا بتعديلات الدستور و لو قلنا "لا" ساعتها هنبقى وحشين و مش عاوزين البلد تستقر و بالذات أننا أكثر حاجة تعبانا فى الدستور دا هى أختصاصات الريس و شكل مجلس الشعب و المفروض ان الناس فاهمة أن دول هما اللى المطلوب منهم يعملوا الدستور الجديد و أل أيه يا حرام مطلوب منهم كمان يقللوا من سلطاتهم  و بصراحة بقى و بمنطق ستى برده أنا كنت فاكر ان الناس فاهمة أن مش معقول أن أبنى هيكون فى حضنى و أروح أدور عليه
 تعالى بقى نتكلم شوية بالعقل أولا أنا رافض اصلا أن يكون فى حاجة أسمها تعديلات دستورية و قبل ما حد يدينى فى وشى و يقولى يا عم متعش بقى هقولك و الله مش موافق و رايح الأستفتاء من منطلق مجبر أخاك لا بطل و رايح مخصوص علشان اقول "لا" و أسمحلى أفهمك بقى أنا هقول "لا" ليه
أولا يعنى ايه كلمة دستور بص يا سيدى دستور يعنى بالبلدى كده ابو القوانين يعنى هو اللى يحدد نظام الحكم يعنى ملكى و الا جمهورى وبيحدد  شكل الحكومة ايه يعنى أما يكون نظام رئاسى فالريس هو اللى يختار رئيس الوزراء أو  برلمانى فأغلبية مجلس الشعب هى اللى تختار رئيس الوزراء و كمان الدستور بيحدد العلاقات و الأختصاصات بين جميع السلطات فى البلد
 الدستور اللى فات بقى اللى هو بتاع 1971 دا كان دستور رئاسى بس كان رئاسى زيادة عن اللزوم حبتين يعنى الريس محدش يقدر يحاسبه و يقدر يصدر قوانين و الريس كان رئيس المجلس العسكرى و رئيس لجهاز الشرطة يعنى بالبلدى هو الكل فى الكل لا يسئل عما يفعل و هم يسئلون
و علشان موجعش دماغك يا سيدى تعالى بقى نخلى كلامنا شوية بالدستور بس خلينا نتفق الول على الآتى و هو أن  دلوقتى فى استفتاء على تعديل بعض مواد الدستور و معنى كده أن الدستور قائم و إن كان معطل حاليا و معنى كده برده أننا لو قولنا نعم زى ما أنت عاوز هيشيلوا المواد الوحشة اللى أحنا عدلنها و يحطوا المواد الحلوة المعدلة
طيب بالعقل كده أزاى الدستور يفضل قائم و تعيين المجلس الأعلى للقوات المسلحة أصلا مخالف للدستور طبقا للمواد 81 و 82 و 83 و 84 و اللى مفيهمش و لا مادة بتقول أن الريس من حقه يفوض القوات المسلحة فى أدارة البلاد يعنى دا قرار غير دستورى و بما أنه وضع قائم و الشعب اللى هو مصدر السلطات راضى عنه يبقى الدستور بتاع 1971 دا ملوش لزمة و نركنه على جنب لأن مينفعش نأخد من الدستور اللى يعجبنا و نسيب اللى ميعجبناش طبعا بقى مش هقولك الكلام بتاع أن دى كانت ثورة مش لعب عيال و مادامت ثورة فإن الثورات فى كل بلاد العالم بتسقط الدستور و كفاية علينا دى بس
نييجى بقى لمواد الدستور المعدلة طبعا أنا مش هتعبك معايا و نقعد نقاشهم مادة مادة بس أحنا أتفقنا و مفيش حد قال غير كده أن مواد الدستور اللى هتتعدل هيشيلوا القديمة و يحطوا الجديدة مكانها و يبقى دا الدستور لحد ما يسهلها ربنا طيب تعالى كده نبص عليهم مع باقى الدستور
المادة 77 معدل بتقول ايه مدة الرئاسة أربع سنوات ميلادية تبدأ من تاريخ إعلان نتيجة الانتخاب. ولا يجوز إعادة انتخاب رئيس الجمهورية إلا لمدة واحدة تانية.
 اما المادة 190 التى لم يمسها التغيير بتقول ايه تنتهى مدرة رئيس الجمهورية الحالى بانقضاء ست سنوات من تاريخ إعلان أنتخابه.
طيب هو مش دا تناقض بين مواد الترقيع قصدى الدستور و ألا ايه
المادة 93 معدل بتقول ايه تختص المحكمة الدستورية العليا بالفصل في صحة عضوية أعضاء مجلس الشعب.
وتقدم الطعون إلى المحكمة خلال مدة لا تتجاوز ثلاثين يومًا من تاريخ إعلان نتيجة الانتخاب. وتفصل المحكمة في الطعن خلال تسعين يومًا من تاريخ وروده إليها. وتعتبر العضوية باطلة من تاريخ إبلاغ مجلس الشعب بقرار المحكمة.
المادة 96 التى لم يمسها التغيير لا يجوز اسقاط عضوية أحد أعضاء المجلس إلا أذا فقد الثقة والاعتبار أو فقد أحد شروط العضوية أو صفة العامل أو الفلاح التى انتخب على اساسها أو أخل بواجبات عضويته ويجب أن يصدر قرار اسقاط العضوية من المجلس بأغلبية ثلثى أعضائه.
متقوليش بقى أن دا كمان ميعتبرش تعارض بين مواد الدستور
سيبنا بقى يا سيدى من التعارضات دى يمكن يعرفوا يلاقولها تصريفة رغم أن تصريفتها الوحيدة هى تعديل مادة من مواد الدستور اللى فيها تناقض و دا هيحتاج أستفتاء تانى و ألا الدستور هيكون معيب و أى محامى شاطر هيطعن بعدم دستورية المواد دى , تعالى بقى نتكلم فى موضوع تانى خالص و هو المادة 189 و اللى هى بتاعت الدستور الجديد اللى هيحل مشاكلنا
المادة 189 معدل لكل من رئيس الجمهورية ومجلس الشعب طلب تعديل مادة أو أكثر من مواد الدستور، ويجب أن يذكر فى طلب التعديل المواد المطلوب تعديلها والأسباب الداعية الى هذا التعديل.
فإذا كان الطلب صادرا من مجلس الشعب وجب أن يكون موقعا من ثلث أعضاء المجلس على الأقل.
وفى جميع الأحوال يناقش المجلس مبدأ التعديل ويصدر قراره فى شأنه بأغلبية أعضائه فإذا رفض الطلب لا يجوز إعادة طلب تعديل المواد ذاتها قبل مضى سنة على هذا الرفض.
وإذا وافق مجلس الشعب على مبدأ التعديل يناقش، بعد شهرين من تاريخ الموافقة المواد المطلوب تعديلها، فإذا وافق التعديل ثلث أعضاء المجلس عرض على الشعب لاستفتائه فى شأنه.
فإذا ووفق على التعديل اعتبر نافذا من تاريخ إعلان نتيجة الاستفتاء.
و لكل من رئيس الجمهورية، وبعد موافقة مجلس الوزراء، ولنصف أعضاء مجلسي الشعب والشورى، طلب إصدار دستور جديد. وتتولى جمعية تأسيسية من مائة عضو، ينتخبهم أغلبية أعضاء المجلسين غير المعينين في اجتماع مشترك، إعداد مشروع الدستور في موعد غايته ستة أشهر من تاريخ تشكيلها، ويعرض رئيس الجمهورية المشروع، خلال خمس عشرة يومًا من إعداده، على الشعب لاستفتائه في شأنه، ويعمل بالدستور من تاريخ إعلان موافقة الشعب عليه في الاستفتاء.
المادة 189 مكررا
يجتمع الأعضاء غير المعينين لأول مجلسي شعب وشورى تاليين لإعلان نتيجة الاستفتاء على تعديل الدستور لاختيار الجمعية التأسيسية المنوط بها إعداد مشروع الدستور الجديد خلال ستة أشهر من انتخابهم، وذلك كله وفقًا لأحكام الفقرة الأخيرة من المادة 189.
المادة 189 مكررا 1
يمارس أول مجلس شورى، بعد إعلان نتيجة الاستفتاء على تعديل الدستور، بأعضائه المنتخبين اختصاصاته.
ويتولى رئيس الجمهورية، فور انتخابه، استكمال تشكيل المجلس بتعيين ثلث أعضائه، ويكون تعيين هؤلاء لاستكمال المدة الباقية للمجلس على النحو المبين بالقانون.
بصراحة بقى المادة دى صعبة شوية علشان هى فيها تناقضات مش فاهمها أولا أما أأقول لكل من فلان و فلان دا معناه أنى أأقصد أنهم لو عاوزين يعملوا يعملو و لو مش عاوزين ميعملوش يعنى براحتهم يعنى ؟؟؟؟ نعم يا أخويا و هو أحنا عملنا ثورة و أستشهد ناس علشان تقولى براحتهم...!!!!! طيب استنى شوية يا عم ما هو حاطط مادة 189 مكرر و 189 مكرر1 و بيقول يجتمع و دا معناه الألزام و معناه أنهم هيعملوا دستور جديد بصراحة بقى أنا مش فاهم الحتة دى و ياريت نشوف حد من أصحابنا اللى هيقولو نعم و يفهمونى أنا و انت
بص بقى قبل ما أنهى كلامى معاك التعديلات الدستورية فى حاجة بس صغيرة أنا كنت عاوز أعلق عليها و هى المادة 139 معدل بص هى بتقول ايه يعين رئيس الجمهورية، خلال ستين يومًا على الأكثر من مباشرته مهام منصبه، نائبًا له أو أكثر ويحدد اختصاصاته. فإذا اقتضت الحال إعفاءه من منصبه وجب أن يعين غيره.
وتسري الشروط الواجب توافرها في رئيس الجمهورية والقواعد المنظمة لمساءلته على واب رئيس الجمهورية.
طبعا انت سامع أن فى خلاف فى شكل الحكومة بين الناس ناس بتقولك عاوزنها برلمانية و ناس بتقولك عاوزنها رئاسية و إن كنت أنا بقول شوية من دا على شوية من دا هيبقى حلو و لكن المادة دى واضح منها أنها بتقول أن النظام هيفضل رئاسى و دى برده حاجة محتاجين حد يفهمها لينا
أكيد يعنى أنت عاوز تسألنى أنت عاوز ايه بالظبط يعنى ما دام مش عاجبك حاجة؟؟؟ طبعا هرد عليك و هقولك أنا يا سيدى و بكل صراحة كده أنا عاوز الدستور يتغير و يعملولنا دستور جديد علشان ابقى عارف الريس اللى هختاره هتكون أختصاصاته أيه قبل ما أختاره يعنى مختارش واحد غميضى كده و بعد كده سيادته ييجى يعمل دستور يحدد أختصاصاته فيه بنفسه بصراحة كده معنديش ثقة فى حد و مش هيبقى أبنى فى حضنى و أدور عليه
طبعا حضرتك زهقت منى و هتقولى بكل غلاسة و هو المجلس العسكرى فاضيلك ما هو وراه شغل و عاوز يسلم البلد لريس جديد علشان يشوفو هما كمان شغلهم ؟؟؟ هرد عليك أنا بقى بكل رخامة و اقولك يا سيدى يا اما يستحملونا شوية على ما نعمل دستور جديد و أهو يعنى العسكر مش عالباب أو يختاروا اثنين قضاة محترمين كويسين و الكل واثق فيهم على واحد عسكرى منهم علشان يضمنوا أن كل شىء بيتم تحت مراقبتهم على ما لجنة الدستور اللى هنختارها تخلص الدستور الجديد و ساعتها المجلس الرئاسى يعمل على تسيير أعمال البلاد الفترة الأنتقالية دى و يريح الجيش
عموما يا سيدى دى وجهة نظرى شرحتهالك و قولتلك انا ليه هقول "لا" للتعديلات الدستورية لو أقتنعت بيها قول أنت كمان "لا" لو مش مقتنع برأيى قول "نعم" و كده أو كده أحنا اصحاب و حبايب و على رأى ستى كل واحد بينام عالجنب اللى يريحه
Share

هناك 3 تعليقات:

  1. انا فى (رايى) الكلام اللى انت كاتبه دا مش داخل دماغى لسبب ان فعلا ابنى لسه فى حضنى وبمقتضى اللى حصل فى 25 يناير ممكن يحصل فى اى وقت احنا عاوزينه
    واللى جاى مش هايكون اشد من اللى راح
    وماتزعلش منى انا بقول رايى

    ردحذف
  2. وبعدين بعد ما يتعين رئيس جمهورية سيتم تشكيل لجنه من 100 فرد من رجال القانون وسيتم عمل استفتاء عليهم لوضع الدستور الجديد للبلاد وبعد وضع الدستور سيتم عمل استفتاء ىخر ولو ملعجبناش يتغير او ميدان التحرير زى ماهو متغيرش
    ولا انت مش معايا

    ردحذف
  3. استاذ أحمد أجمل ما فى الديموقراطية هو ثقافة الأختلاف و تقبل الراى و الرأى الآخر و أحترم رأيك و لكن دعنا نقاشه
    حتى ميدان التحرير رمز الثورة التى أعجب بها العالم كله معارضيها الوحيدين كانوا من ابناء وطننا إما بحسن نية أو عن طريق الثورة المضادة و تعاظم دور معارضى ثورة 25 يناير هذه الأيام و هذا ما نشاهده الآن من تخوين يتم على موقع الفيس بوك لمعظم من شاركوا فى الثورة و أعتبروا من رموز بدايتها مثل تخوين كل من وائل غنيم و أسراء عبد الفتاح و الشيخ صفوت حجازى و الدكتور علاء الأسوانى و ظهور بعض الناس التى تنادى بالأعتذار للرئيس المخلوع او تكريمه كحملة أنا آسف يا ريس و هؤلاء صوتهم ضعيف الآن لأنه غير مستساغ وسط الزخم الثورى أما بعد أن تهدأ الأمور و ياتى رئيس جديد ايا من كان فسوف ترى الأقلام التى تتسابق لصنع إله جديد منه و سوف ترى البرامج التى تتسابق لمبايعته و الترويج له و لما ينتهى التعديل الدستورى سترى حجم التوجيه الأعلامى لقبوله ايا ما كان و على انه انجاز العصر حتى لو كنت أنت كمثقف ترى انه امرا غير مستساغ
    أما ما يزيد شكوكى بالنسبة لقبولى بالتعديلات الدستورية فهو نقاط استفهام كثيرة تحتاج إلى أيجابات تؤدى غلى عودة الثقة من هذه النقاط عدم التحقيق مع الرئيس المخلوع حتى الآن بشكل رسمى و عدم استدعائه للنيابة و بقاء زكريا عزمى حتى الآن رئيسا للديوان و بقاء صفوت الشريف حتى الآن حرا طليقا هو و أحمد فتحى سرور و عدم العلانية فى محاكمة حبيب العادلى و أنباء عن اداء بعض العساكر و الضباط التحية العسكرية له و عدم القبض على الضابط وائل الكومى حتى الآن و الأكتفاء بنقل مدير أمن السويس و عدم محاسبته و الكثير و الكثير من نقاط الستفهام التى تؤدى إلى أنعدام الثقة إذا وجدت لى أجابة أخى أحمد على هذه الأسئلة بالأضافة لإجابة اسئلتى الخاصة بالتعديلات الدستورية وقتها سأطمئن أن أبنى لازال فى حضنى و لن أتعب نفسى فى البحث عنه و ستعود ليا الثقة أما ترك هذه الأسئلة بدون أجابات فوقتها اطالبك بأعادة النظر فى لما ستقول نعم للتعديلات الدستورية

    ردحذف