فيديو .. قناة خمسة تهييس الحلقة الأولى من أنتم ؟

خمسة تهييس ..هى حلقة اسبوعية كلها تهييس>> استننى كل اسبوع حلقة و لو منزلتش استنى اسبوع كمان :) 

أستمرارا لقنوات اليوتيوب تطل علينا هذه المرة قناة خمسة تهييس و رغم أختصار أصحاب القناة فى التعريف بقناتهم إلا أنه من الحلقة الأولى لهم أتوقع ان تكون الحلقات عبارة عن نقد ساخر لغياب الوعى الثقافى لدى فئة كبيرة من المواطنيين محاولة من اصحاب القناة للضغط على الجروح بطريقة تعتمد على الفكاهة فى العرض

أولى حلقات تهييس تم تصويرها بميدان مصطفى محمود و تظهر مدى سطحية أفكار متظاهرى مصطفى محمود و كيف تحركهم أما العاطفة أو الجهل و إن كنت أضيف لهذا الصدمة التى لم يستوعبها مرتادى مصطفى محمود حتى الآن

قناة تهييس لها صفحة عالفيس بوك توالى التواصل مع مشاهدى القناة اضافة غلى التنويه عن جديد فيديوهات القناة

صفحة خمسة تهييس عالفيس بوك

تم نشر مقالين عن حلقة تهييس الأولى المقال الأول بموقع بص و طل و المقال الثانى بموقع جريدة الوفد

مقال بص و طل

إلى صابر عابدين من برك الخيام خليك في مصطفى محمود

المواطن صابر عابدين من برك الخيام مواطن مصري، لكنه مش مصري عادي.. ده مصري من بتوع مصطفى محمود، والله أنا مش صعبان عليّ غير مصطفى محمود ده.. الراجل المحترم اللي الظروف خلاته يشوف كل أمراض المصريين؛ ابتداء بالأمراض العضوية للي بيروحوا المستشفى بتاعه، وانتهاء بالأمراض التانية للي بيروحوا الميدان بتاعه!!

وفي ميدان مصطفى محمود شفنا حالة المواطن صابر عابدين.. المواطن صابر عابدين صاحب وجهة نظر.. الراجل شايف إن المصريين مش هيبقى لهم كرامة بعد الثورة.. وشايف إن الأرض اللي إحنا واقفين عليها دي عملها حسني مبارك.. ومش عارف بصراحة عملها إزاي، بس هو أكيد الريس عملها وعمل أكتر منها كمان.. لأن المواطن صابر عابدين شايف إن الريس مبارك هو اللي عمل الجلابية اللي هو لابسها، وهو اللي عمل الضحكة اللي في وشي والملح اللي في مِشّي..

المواطن صابر عابدين شايف إن كل الشعب المصري مهلوس وبيشرب برشام، وهو بعينه -اللي ياكلها الدود- شاف شرايط زرقا بتتوزّع في التحرير.. وشاهد حيّ إن الإخوان المسلمين بيفرّقوا حشيش.. يبقى كده نشاطات الجماعة بقت سياسة وتربية ودعوة عامة ومخدرات، ومش بعيد يكون من بين تصنيفات الإخوان محب ومؤيد ومحشش!! وكمان عبود الزمر طلع عضو في الإخوان، أكيد عضو "هيدين" ولا حاجة، ده باين برشام التحرير هبّ عليه في مصطفى محمود!!

المواطن صابر عابدين خرّيج خامسة ابتدائي بس شايف إن أهم ما فعله مبارك هو النهوض بالتعليم.. صابر عابدين ماتخفاهوش خافية: عارف إن البرادعي هو اللي سلّم صدام زي الخروف للأمريكان، وعارف إن أيمن نور بيهرّب آثار لفرنسا، وعارف إن حمدين صباحي عنده مصنع خمور تحت السلم في كفر الشيخ، وحتى البسطاويسي الراجل اللي محدش سمع عنه حاجة وحشة، صابر عابدين من هذا المزنق بيوجه له سؤال غامض عشان ربنا يكفينا شر الفضايح بيقول له: الطب الشرعي موجود في مشرحة زينهم. قل له كده وهو هيفهم!!

حالة المواطن صابر عابدين حالة غامضة، شايف إن مبارك هو أبوه ومع ذلك بيكره الحزب الوطني اللي كان رئيسه حسني مبارك..

حالة المواطن صابر عابدين حيرتني كتير.. مش عارف أقول عنه إيه.. أتمنى إن كل بتوع مصطفى محمود ما يكونوش زي صابر عابدين؛ لأن لو حد تاني عنده كل هذا الكم الضخم من المعلومات الخفية والملفات السرية واللباقة والمرونة في الحوار ده يبقى الثورة المضادة هتقضي على الثورة الحقيقية!!!

أنصار الثورة المضادة يصعب جمعهم معا في ثلة واحدة؛ لأن فيهم شباب متعاطف مع مبارك وتربّى على البرنامج العام وصوت العرب والأهرام والجمهورية والالتصاق الأبدي بين "السيد والرئيس"، وبين مواطنين مش شايفين البلد فيها حاجة وحشة، إلا إن الأوردرات بتتأخر ومش بتوصل بسرعة! وبين مستفيدين حقيقيين من بقاء النظام السابق بيتسهّل لهم إجراءات وبتتفصّل لهم قوانين وبتتزوّر لهم انتخابات، ودول أكثر الفئات التي تهتف بحرقة في ميدان مصطفى محمود..

بصراحة أنا ضد آفة التعميم وخصوصا تعميم الاتهام، فمن الطبيعي أن يحدث اختلاف منطقي حول أي قضية، ده حتى وجود الله الذي هو الحقيقة الأولى لم يتفق عليه الجميع، أي نعم المنكرين لهم نار جهنم وبئس المصير ولكن الله سبحانه سمح لهم بالحرية.. "فمن شاء فليؤمن ومن شاء فليكفر"... ثم أكمل "إنا أعتدنا للظالمين نارا"..

وخطابي اليوم إلى المواطن صابر عابدين وكل الفئات وطني، المتشحتفين على الرئيس مبارك أبونا اللي موكلنا وملبّسنا ومدلّعنا ومشخلعنا، أعدكم بتحقيق أحلامكم.. أحلامكم الحقيقية.. أحلام أولادكم وبناتكم في مستقبل أحسن، صابر عابدين اللي خرج من خامسة ابتدائي عشان يصرف على اخواته ابنه مش هيبقى مضطر يعمل زيه، بدل العشة اللي ساكن فيها في برك الخيام من حقه وحدة سكنية تليق بآدميته وتحترم مصريّته أمام أهله وجيرانه وأمام نفسه.. اللي بيقف وبتقف في الطابور من يوم عشرين لحد يوم تلاتين مستني أو مستنية السبعين جنيه معاش مبارك من حقه ومن حقها إننا نكرّمهم ونراعي ربنا فيهم، اللي بيشتغل بلطجي عشان يصرف على أولاده ومضطر يمسك مطواة ويشيل سنجة، واللي بتضطر تخانق وتزاحم وتشرشح عشان البيه اللي مقبّضها، هنحفظ كرامته وكرامتها أكتر وهنوفّر لهم دخل أفضل وحياة آدمية أكثر رقيا..

كذاب كل من يدعي أنه كان مرتاحا في عهد مبارك، ويخدع نفسه كل من يظنّ أن الثورة ضده، الثورة ثورة مصر، قامت عشان كل مصري يرفع راسه فوق؛ لأنه مصري..

الثورة لن تُقصي أحدا، ولن تظلم أحدا، ولن تقتصّ من أحد، ولهذا أدعو المواطن صابر عابدين من برك الخيام إلى أن يقف في مصطفى محمود حتى يرى الحقيقة التي ربما لم يرها بعد.. والتي قد بانت بشائرها في حياة أكثر ديمقراطية ودستور يحترم حقوق المواطن، ووزارة شفافة تقوم بواجباتها لا تكذب ولا تخادع ولا تراوغ.. واحترام عالمي وشهادات من دول متقدمة بهذا، وإحساس حقيقي بمعنى كلمة مصر..

صديقي المواطن صابر عابدين وكل الصابرين والعابدين.. افعلوا ما شئتم بشرط ألا تخدعوا أنفسكم أو تخالفوا ضمائركم..

المصدر موقع بص و طل

  مقال عن قناة خمسة تهييس بجريدة الوفد الألكترونية

فيديو.. برشام الثوار وحشيش الإخوان وخمور صباحي

لمؤيدي الرئيس المخلوع حسني مبارك حججهم، التي قد نراها غير مقنعة، أو "مدفوعة الأجر".. لكنهم يرددونها بكل ثقة. في هذه الحلقة من برنامج (خمسة تهييس) المسجلة في 8 أبريل الجاري، ستسمع حججا عن دور مبارك البطولي في "حرب النكسة"، وعن "ان الجلابية اللي لابسها دي اتعملت في عهده"، واتهامات لثوار التحرير بـ"ضرب برشام هلوسة" وللإخوان بـ"يفرقوا حشيش" وحمدين صباحي بـ"مصنع خمور تحت بير سلم بيته"، ولأيمن نور بـ"تهريب آثار لفرنسا"، وهشام بسطويسي بـ"تقريرالطب الشرعي في مشرحة زينهم.. وهو ح يفهم".

اقرأ المقال الأصلي علي بوابة الوفد الاليكترونية فيديو.. برشام الثوار وحشيش الإخوان وخمور صباحي