نوارة نجم .. جمعة الشريحة


نوارة نجم
جمعة الشريحة
Sunday, July 31, 2011 at 11:01am

المقال مكتوب باللغة العامية الفصحـــــــــى.
يا نهار ضحك على ده يوم. قبل أى حاجة، الحمد لله إن إبراهيم الهضيبى سليم لإنه يوم الخميس بالليل ضغطه كان 150/110 ولو كنتوا خسّرتونى إبراهيم كنت ولعت فيكو كلكو، وعليكو وعلى الثورة وعلى البلد كلها بصراحة.
تانى حاجة، أنا عايزة إيه السند الشرعى اللى على أساسه ناس بتقول قال الله وقال الرسول وحنثوا بالعهد، ونكثوا بالوعد، وكلوا كل اللى عمل معاهم توافق على قفاه؟ أكيد مستندين على حديث رواه ياكوف بن كوهين غضب الله عليه ومرمطه دنيا وآخرة قادر يا كريم.
تالت حاجة، أعمل إيه أنا دلوقت يا ربى؟ الناس عمالة تتخانق مع بعضها، وأهالى الشهداء بيتعاملوا معاملة الكلاب الضالة، والمصابين بيتعاقبوا عشان ضحوا لبلدهم، وبدل ما نطلع المعتقلين اللى خززوا فى السجون من أيام المخلوع زاد عليهم محابيس المحاكم العسكرية، وممدوح حمزة بيطلع يتكلم باسم الاعتصام ومش عارفة مين اللى اختاره؟ والإخوان قرروا فجأة يسحبوا لنا السلفيين فى إيدهم ويقعدوهم معانا فى كل قعدة، والسلفيين بيلبسوا لبس أبو لهب وبينزلوا يمثلوا فيلم أى شُلّت يدى.. هاهاها إنها سليمة فى الميدان. السلفيين، يالهوى على اللى عملوه، مبدئيا، قالوا لك احنا نازلين نطهر الميدان من الكفرة، جه المهندس إبراهيم المعلم لم الناس بناء على طلب إبراهيم الهضيبى ود.رباب المهدى عشان يعملوا توافق. حزب النور السلفى ومجموعة عبد المنعم الشحات قالوا دى مبادرة هايلة، بس لو تزودوا مطلب إلغاء المواد فوق الدستورية نمضى معاكم، لو ما زودتوهاش احنا ملتزمين بالبنود اللى فى الاتفاق بس مش حنوقع. قشطة.. الراجل بيتمسك من كلمته. ثم إذ فجأتن لقينا لك حزب النور ومجموعة عبد المنعم الشحات راحت لمت كل السلفيين اللى خلقهم ربنا فى مصر من كل المحافظات وشحنتهم فى أتوبيسات، وواحدة ست معدية قدام الميدان قالت لبنتها: دولت طالعين السعودية.. عمرة رمضان. وراحوا داخلين علينا: الشعب يريد تطبيق شرع الله.. إسلامية إسلامية.. ارفع راسك فوق إنت مسلم.. المسلم يريد إقامة الصلاة. ما تقيمها يا عم هو احنا قلنا لك عُد إلى دين آبائك؟ وإيه اللى جاب سيرة شرع الله دلوقت هو حد اعترض على شرع الله؟ وإسلامية إسلامية على أساس إنك داخل على قريش هنا فى الاعتصام؟ وارفع راسك فوق إنت مسلم نقطع لك راس المسيحيين يعنى ولاّ إيه؟ والمسيحيين راحوا اتخضوا راخرين ومسكوا فىّ أنا: إنت اللى رحتى عملتى توافق.. طب أعمل إيه يعنى؟ أعملهم محرقة نازى مثلا؟
ناس وموجودين، وبعد ما كانوا بيقولوا الخروج على الحاكم حرام قرروا يخشوا براسهم فى السياسة، ودخلوا من منفذ الإخوان، وقالوا جايين نطهر الميدان من الكفرة واليساريين والأنجاس، ما هو يا كنا نلم عزالنا ونسيب حق اللى ماتوا، يا نستناهم ييجوا يعفقوا أهالى الشهدا لحد ما يبعتوهم لعيالهم، يا نحاول نفهم بس إيه اللى مزعلهم من الاعتصام؟ وكل ما أكلمهم يقولوا لى ممدوح حمزة.. حد يسكت ممدوح حمزة بقى. والشهادة لله السلفيين بعد مبادرة التوافق ما عملوش حاجة، أقصد غير إنهم نقضوا معاهدة الالتزام بشعارات الإجماع الوطنى، ومثلوا فيلم فجر الإسلام، ووسخوا الميدان وما نضفوهوش قبل ما يمشوا. لكن ما فضوش الاعتصام، ولا دخلوا يفتشوا فى الخيم على الدعارة، ولا شنقوا حد زى ما كانوا بيتوعدونا، بس قالوا يا أوباما كلنا أسامة، راح ممدوح موافى فى نفس اليوم اجتمع مع كلينتون وقالها لو ما شربتيش اللبن حتبقى زى عمو الجرسون، وشكلنا كده من تحت راسهم لا حتبقى إسلامية ولا علمانية ولا بتنجانية، وحنلبس فى حكم عسكرى وحيخشوا السجن تانى واحنا حنقعد لنا ستين سنة تانيين نقول: يسقط يسقط حكم العسكر.
ميرسى ليكو كتير على ذوقكم.


هذا المحتوى من





Share

ليست هناك تعليقات:

إرسال تعليق