ثلاث أخبار على تويتر يولعوا الدنيا
الثوار يغلقون مجمع التحرير
أنباء عن اقالة عصام شرف
شفيق يظهر مع المشير
و طبعا دا كله فى ظل ضياع باسورد خساب المجلس العسكرى عالفيس بوك علشان كده بطل يطلع بيانات
و بما أن مصر منقسمة اليوم إلى ثلاث فئات بلطجية و فلول و كنبجية فأكيد كل خبر من دول هيأثر فيهم بشكل معين
يعنى بالنسبة للكنبجية أغلاق مجمع التحرير مادام مالهمش مصالح هناك مش هيتكلموا بالذات بعد الشو الأعلامى الحلو اللى حصل من موظفين المجمع اللى مصدقوا يزوغوا و أعلنوا تأييدهم للتصعيد بما انه هيضمن اجازة ليهم و كمان تبرعوا بأنهم يقوموا بأرشاد المواطنين عن كيفية تسيير مصالحهم بوسائل حكومية أخرى غير المجمع فالموضوع دا هيكون فى صف الثوار و هيكسب تأييد من الكنبجية و بالنسبة للفلول فيكفيهم وجود توفيق عكاشة و أحمد سبايدر فى وسطيهم علشان يخلوهم بدون قيمة اما بالنسبة للثوار فأتمنى تجنيب أى خلافات و السير على نفس المنوال من توحيد الصف و المطالب و التركيز على التطهير الفورى لجهاز الشرطة و طبعا ضباط الداخلية المطلوب تطهير الداخلية منهم معروفين بالأسم و 6 أبريل و الأئتلاف قدموا قوائم بأساميهم و المطلب الثانى الخاص بعلانية المحاكمات و دا ايضا لا تنازل و لا تفاوض فيه و اضيف لهذا اقالة النائب العام لمسئوليته المباشرة عن أخلاء سبيل ضباط السويس قتلة المتظاهرين بسبب خطا فى أجراءات الضبط و هى مسئولية مباشرة للنائب العام ووزير الداخلية
أنباء اقالة شرف هيظهر ردود الفعل عليها فى الساعات القادمة سواء بالتكذيب او التأكيد
نيجى بقى لأبو بلوفر و اللى حصلى بسببه
"يا حلو بانت لبتك من يوم ما وقعت قشرتك تحرم عليا محبتك .. ..اه يا قفا اه يا قفا"
قالهالى واحد صاحبى من الرعاة الرسميين للأستقرار اول ما شوفنا شفيق فى عرض تخريج دفعة كلية الشرطة طبعا فى البداية أنا و هو فى نفس واحد دا شفيق لا مش شفيق دا شفيق لا مش شفيق فرد برده صاحبى و قالى شفيق يا راجل
طبعا جريت على تويتر لقيت الناس بتقول شفيق يبقى خلاص شفيق
نزلت بعينى شوية لقيت ناس بتتكلم فى وسط الكلام عن أقالة عصام شرف
فصاحبى رد و قالى شالو ألدو حطوا شاهين ألدو قال محناش لاعبين
هو فى ايه يا جدعان ما حد يفهمنى بقى علشان أنا بقيت صاحب مرض من ساعة المجلس العسكرى ما مسك و المرارة معدش فيها طيب لو دا شفيق أيه لزمته حضوره العرض العسكرى و بصفته ايه أصلا يحضر العرض العسكرى
طيب لو دا شفيق نعتبره ايه بقى نعتبره أستفزاز مثلا علشان الثوار يصعدوا و الشعب يقوم عليهم يبقى نفس الرهان الغبى اللى راهنه مبارك لما افتكر أن خطابه بتاع الثلاث هيخلى الناس أما تتخلى عن ثوار التحرير او تنزل تهاجمهم مع البلطجية
أو ممكن يكون شىء تانى خالص مرتبط بأشاعة أقالة شرف اللى جابه الثوار و دا شفيق اللى مشاه الثوار و الثوار دول مش عاجبهم حد و هيودوا البلد فى داهية و هم السبب فى عدم الأستقرار حتى الآن و يكون دا ضمان لعدم نزول الكنبجية من عالكنب لو أتخذ المجلس العسكرى أى قرار بخصوص أعتصام التحرير و دا طبعا فى ظل البيان اللى ملهوش لزمة بتاع النيابة اللى كاتبين فيه أن كل القضايا أما اتأجلت أو أتحددلها جلسات أقرب جلسه فيهم جلسة مبارك فى شهر 8 و اللى اتحكم فيه هى قضايا أمناء الشرطة الغلابة يعنى كأنك يا ابو زيد ما غزيت
لو دا فعلا شفيق يبقى المجلس العسكرى بيقولها بالبلدى كده طز فى الثوار و لو ليها اى معنى تانى حد يفهمنىلأنى مش فاهم غير اللى قولته
يبقى أحنا محتاجين تفسير لوجود شفيق فى العرض العسكرى بالذات أنه تزامن مع تنفيض المجلس العسكرى و الأنباء عن اقالة شرف و يا ريت اللى فاهم حاجة يفهمنى
ليست هناك تعليقات:
إرسال تعليق