بسم الله الرحمن الرحيم
كنت زمان لما اروح العب كوره عالبحر طبعا كنت بارجع معفر وكلي تراب ورمل .. كانت امي اساسا ما ترضاش تدخلني البيت كانت تقابلني بجركن ميه وتقولي عالسطح اغسل رجلك وبعدين ادخل عالبيت
مصر بقى لها كتير اوي بتلعب كوره وبيتلعب بيها كوره ... لدرجة ان بقى عليها طبقات تراكميه من الشوائب والاوساخ اللي كان السبب فيها اوسخ اهل الارض
كنا دايما نسال نفسنا ليه المصري لما يكون في اي مكان بره مصر الناس كلها بتبص له بقرف وبتبقى مشمئزه منه وهو اساسا بيبقى قرفان من نفسه ومش عاجبه حاله ابدا
لانه عليه تراب وعفار عباره عن فساد وكدب ونصب وفهلوه وكل حاجه سيئه صدروها لينا البهوات اللي كانوا بيوسخوا مصر
عبد الناصر وحكمه كانوا بيوسخوا مصر لما افتكروا ان البلد بلدهم وكعادتهم وعادة العسكر في كل مكان ... ضباط جيش ما عجبهمش حال مصر لقوها عاوزه تنضف عملوا انقلاب عسكري على الملك وخلعوه .. المفروض كانوا يطبقوا الدستور او يلغوه ويسلموا الحكم لاشخاص موثوق فيه .. لكن ازاي ... حليت في عنيهم الغاليه وقاللك نحكمها احنا ولانهم رمز القذاره قعدوا يزودوا طبقات الفساد والمحسوبيه واستعراض القوه وكأن البلد وارثينها بشعبها .. ممكن يكون عبد الناصر كان بينضف بس كان بينضف وهو بعينه شايف اتباعه بيوسخوا وما بيقولهمش غلط... ما بيقولهمش النظافه من الايمان )
وازدادت طبقات الفساد على الغاليه
وجالنا السادات اللي الناس اصلا ما كانتش قابلاه وعمل اقتصاد حر وبدل ما نرفع شان مصر وننضفها .. زاد عدد اللي بيحطوا عليها
وعمل كامب ديفيد علشان هو شاف ان القرف اللي مصر فيه قليل عليها قام استورد قرف من بره وبقت الطبقات .. فساد وذل وكذب وسرقه واحتقار من كافة شعوب العرب وبيع لتراب مصر النضيف بابخس الاسعار .. وبعدين مات الاخ مقتول
بعد ما خلى طبقات القذاره الف
وجالنا مبارك محمل بالاتربه والفساد والجهل والجشع والطمع وده اللي بينطبق عليه المثل الرائع ( شبع من بعد جوع ) ما كانش مصدق نفسه ولا هو ولا مراته ولا عياله ولا اللي حواليه ... بيهبشوا وينهبوا من خيرها ويخبوا فلوسهم براها لا وكمان يشحتوا علينا والفلوس اللي بيشحتوها بيسرقوها لا وايه كمان بيضربونا ويعذبونا عقابا لمصر وعقابا لينا على صمتنا وهو بيوسخ في البلد هو وعيلته الزباله واحنا بناخد على قفانا ومش قادرين ننضف لغاية لما طبقات الفساد والنهب والوساخه زادت وكتمت على قلب مصر وحسينا انها جالها ازمه قلبيه ولما حسينا على دمنا وقلنا هننضف وخلعنا مبارك
جالنا المجلس العسكري اللي القرار فيه لو جماعي يبقى كلهم غلط ولو فردي يبقى كلهم غلط بردو وكنا مستنينهم يحموا مصر وينضفوها معانا ونشيل الاوساخ والقاذورات مع بعض من على جسمها علشان نبنيها على نضيف لكن لقيناهم ما بينضفوش والله اعلم بيوسخوا ولا لا
علشان كده شباب مصر الرائع هب تاني وثار تاني وحاليا مصر بتجهز نفسها علشان تستحمى
ولان مصر هي ام الرجال يبقى مصر باكتر من اربعين مليون راجل والرجاله بس ( الرجوله في القلب والمواقف ) يعني عادي بنات رجاله وولاد رجاه
الرجاله دول بس هما اللي هيحموها وينضفوها اما الناس اللي بتدافع عن القذاره هيندموا لما مصر تستحمى وهما يفضلوا بعبلهم
الرجاله بس هما اللي هيبنوا مصر اما الناس اللي بتدافع عن القذاره وبيتاسفوا للي هدها .. ان شاء الله واحنا بنهد علشان نبني على نضيف هتتهد على دماغهم
يالا يا جماعه البنات تزغرد والرجاله تكبر
مصر بتستحمى
ليست هناك تعليقات:
إرسال تعليق